Missjoni

Il-missjoni ġenerali tal-IPObe l hija li tipproteġi l-proprjetà intellettwali fil-Belġju. Għal dan il-għan, hija responsabbli għall-ħruġ u l-immaniġġjar ta' ċertifikati Belġjani ta' proprjetà industrijali ( brevetti, ċertifikati ta' protezzjoni supplimentari u drittijiet ta' varjetajiet ta' pjanti) , l-għoti ta' informazzjoni lill-utenti dwar il-proprjetà intellettwali, it-tħejjija ta' testi legali, il-konsulenza lill-gvernijiet u r-rappreżentanza tal-Belġju internazzjonalment.

Madankollu, l-organizzazzjoni responsabbli għall -ħruġ u l-immaniġġjar tat-trademarks, il-mudelli u d-disinji tal-Benelux hija l- Uffiċċju tal-Benelux għall-Proprjetà Intellettwali (BOIP) . L-informazzjoni kollha dwar il-protezzjoni ta’ dawn id-drittijiet tal-IP tista’ tinstab fuq www.boip.int.

Għall-pubbliku ġenerali, l-IPObel huwa fuq kollox l-uffiċċju fejn tista' tressaq talbiet għal privattivi, ċertifikati ta' protezzjoni supplimentari għal mediċini u prodotti fitofarmaċewtiċi, u ċertifikati ta' drittijiet ta' varjetajiet ta' pjanti, li kollha joħorġu mill-IPObel stess. Huwa wkoll l-uffiċċju li jamministra l-kontinwazzjoni ta' dawn id-drittijiet.

Minbarra l-kompiti amministrattivi tagħha, l-IPObel għandha rwol importanti fil-provvista ta' informazzjoni. Tipprovdi punt ta' kuntatt u websajt fejn il-pubbliku ġenerali jista' jaċċessa informazzjoni dwar il-proprjetà intellettwali b'mod ġenerali, kif ukoll ġabra kbira ta' dokumenti tal-brevetti u ċertifikati tad-drittijiet tal-varjetajiet tal-pjanti.

Barra minn hekk, IPObel tipparteċipa b'mod attiv fl-iżvilupp u l-adattament ta' regolamenti, trattati u ftehimiet nazzjonali, Ewropej u internazzjonali dwar il-proprjetà intellettwali Belġjani.

Servizzi

Is-servizzi ta' IPObel huma meħuda ħsieb minn numru ta' unitajiet differenti:

L- Unità tal-Affarijiet Legali u Internazzjonali tfassal u tadatta l-liġijiet u r-regolamenti applikabbli dwar il-proprjetà intellettwali skont il-bidliet fil-liġi komunitarja u internazzjonali, inklużi l-liġijiet u r-regolamenti dwar id-drittijiet tal-awtur. Tirrappreżenta l-interessi tal-proprjetà intellettwali tal-Belġju f'organizzazzjonijiet intergovernattivi rilevanti: l-Uffiċċju tal-Proprjetà Intellettwali tal-Benelux, l-Uffiċċju tal-Proprjetà Intellettwali tal-Unjoni Ewropea, l-Uffiċċju Komunitarju tal-Varjetajiet tal-Pjanti, l-Uffiċċju Ewropew tal-Brevetti, l-Organizzazzjoni Dinjija tal-Proprjetà Intellettwali, l-Unjoni Internazzjonali għall-Protezzjoni tal-Varjetajiet tal-Pjanti u l-Organizzazzjoni Dinjija tal-Kummerċ. Tissorvelja wkoll is-segretarjat għall-korpi konsultattivi u tat-teħid tad-deċiżjonijiet dwar il-proprjetà intellettwali u tipprovdi opinjoni dwar l-ambitu tal-liġijiet u r-regolamenti dwar il-proprjetà intellettwali.

L- Unità tal-Produzzjoni hija prinċipalment inkarigata mir-reġistrazzjoni, l-għoti u l-pubblikazzjoni ta' privattivi, ċertifikati ta' protezzjoni supplimentari u drittijiet ta' varjetajiet ta' pjanti fil-Belġju.

L-Unità Finanzjarja u tal-Informazzjoni tinvolvi ruħha fil-promozzjoni, ir-riċerka, u d-distribuzzjoni (kemm jista' jkun wiesa') ta' informazzjoni dwar id-drittijiet kollha tal-proprjetà intellettwali u tiġbor taxxi fuq ir-reġistrazzjoni, il-pubblikazzjoni u l-manutenzjoni għall -brevetti, iċ-ċertifikati ta' protezzjoni supplimentari u d-drittijiet tal-varjetajiet tal-pjanti.