L-għan tagħna hu li nindirizzaw it-tibdil fil-klima permezz tal-innovazzjoni. Aħna l-akbar sħubija pubblika-privata tal-Ewropa b'dan l-għan – komunità pan-Ewropea li qed tikber ta' organizzazzjonijiet diversi magħqudin b'impenn li jidderieġu l-qawwa tal-kreattività u l-inġenwità umana lejn l-isfida tat-tibdil fil-klima. Inġibu flimkien kumpaniji kbar u żgħar, istituzzjonijiet xjentifiċi u universitajiet, awtoritajiet tal-bliet u korpi pubbliċi oħra, negozji ġodda, u studenti.

B'aktar minn 450 sieħeb organizzattiv formali minn aktar minn 30 pajjiż, naħdmu fuq l-innovazzjoni biex innaqqsu t-tibdil fil-klima u nadattaw għall-impatti inevitabbli tiegħu. Il-missjoni tagħna hi li nikkatalizzaw bidla sistemika permezz tal-innovazzjoni f'oqsma ta' attività umana li għandhom impatt kritiku fuq l-emissjonijiet ta' gassijiet serra – bliet, użu tal-art, materjali u finanzi – u li noħolqu komunitajiet reżiljenti għall-klima.

It-Teorija tal-Bidla tagħna hija ffukata fuq li nagħtu s-setgħa lin-nies biex ibiddlu s-sistemi – permezz tal-esplorazzjoni, l-esperimentazzjoni u d-dimostrazzjoni – biex jippermettu alternattivi vijabbli fuq skala kbira. Għaliex? Il-ġenerazzjoni tagħna qed tiffaċċja l-isfida li tnaqqas l-emissjonijiet netti ta’ gassijiet serra għal żero fl-20–30 sena li ġejjin billi tbiddel kważi kull aspett tal-modi kif il-bnedmin bħalissa jgħixu, jaħdmu u jilagħbu biex tevita żieda katastrofika fit-temperatura globali. Biex nilħqu dik l-isfida jeħtieġ trasformazzjoni, li biha nfissru bidliet radikali li jseħħu simultanjament, b’mod olistiku u aktar malajr milli qatt esperjenzajna bidla qabel.